أصعب سؤال ..
لما بتيجى تقوللى احكيلى عن نفسك ..
بتلخبط أوى
ولا ببقى عارفه أحكى ايه وأخبى ايه ..
وغالبا
ببدأ بحاجة مكانش ينفع تتحكى
واما بلاقيك مش فاهم ..
بتلخبط زيادة
طيب .. هقولك
كان فى بنت و حلم وشباك ..
وكان فى .. ورق وأقلام وناس كتير
وكان فى شوارع طويلة جدا .. مبتوديش على أى حته
وكان فى بيوت .. مقفولة
فهمت حاجة؟
طيب متسألنى السؤال بطريقة تانية؟
ولا أقولك ؟ أحكيهالك بشكل تانى ..
كان فى بنت بتطير حلمها من الشباك ..
وقابلت ناس كتير .. وكتبت كلام كتير ..
ومشيت شوارع طويلة جدا .. مودتهاش على أى حته
لأنها مكانتش بتحب البيوت المقفولة ..
فهمت حاجة؟
بقولك ايه ؟ ما تيجى نغير الموضوع؟
ليست هناك تعليقات:
إرسال تعليق
قول ما بدالك