1- القصة.. كلنا -بطريقة أو بأخرى- فاني برايس:
في عيلة عادية جدا في حي يهودي متواضع/فقير/بائس جدا، كانت فاني برايس عايشة، حواليها أمها وجيرانها اللي كانوا مقتنعين تماما إن البنات المفروض تكون جميلة عشان تتجوز. خلص دور البنات عالأرض كده تماما، البنت المفروض تكون حلوة ومسمسمة ونغشة كده عشان تلاقيلها عريس حلو يتجوزها.
وفاني مكانتش الفيمنست الفشيخة اللي شايفة الجواز مش هدف الحياة الأسمى، ولا كانت بتغالط نفسها لحظة بشغل "حبي نفسك" و"أنا مزة أصلا" والجو ده. فاني كانت عارفة إنها مش جميلة - بغض النظر عن الكافر اللي قرر يطلع باربارا سترايسند في دور واحدة مش جميلة، مش فاهمة لو هي مش جميلة أمال إيه مفهوم أهلك عن الجمال بالظبط؟ - ومتصالحة مع ده، زي ماهي متصالحة مع أصلها الفقير من غير ما تعيش دور ليلى بنت الفقراء.. هي عارفة إن نقطة قوتها مش شكلها خالص، نقطة قوتها هي خفة روحها وموهبتها، وحبها الشديد جدا لخشبة المسرح..
وفي الوقت اللي كان كل اللي حواليها بيأكدولها إنها مدام مش جميلة مستحيل تبقى حاجة، كان الكلام بيتزحلق من على عقلها زي البيض ما بيتزحلق من عالطاسة التيفال بالظبط.. هي كانت مدركة موهبتها تماما، ومسلمالها نفسها تماما، واستقتالها ده اللي خلى فشلها التام كراقصة في عرض من العروض، هو بداية مستقبلها المهني كنجمة استعراضية كوميدية ومطربة.
الوعي والإدراك في رأيي كانوا أهم ما في شخصية فاني، يمكن أهم من موهبتها نفسها، إدراكها إيه اللي ممكن تعمله وإيه اللي مش ممكن تعمله، إيه اللي تقدر عليه وإيه اللي مقتدرش عليه.. الإدراك اللي خلاها تغير أغنيتها في عرض على واحد من أهم مسارح البلد وتعمله بطريقة كوميدية لأن الأغنية الأصلية بتغنيها بنت المفروض إنها بتتباهى بجمالها، وفاني مدركة إنها مش جميلة، ومش مقتنعة إنها ممكن تطلع تتغزل في نفسها قدام جمهور المسرح بحجة جمال صوتها أو موهبتها فبتنجح وبتكسر الدنيا، وبتحط شروطها لصاحب أكبر مسرح في المدينة، أنا اللي أختار أغانيّا، وانا اللي أختار النكتة اللي تضحك الناس معايا مش عليا.
وفي ليلة النجاح الساحق بتقابل الأمير الأسمر على الحصان الأبيض، عمر الشريف، اللي كانت مقتنعة من أول لحظة إنه كتير عليها.
ننط شوية في أحداث الفيلم، ونلاقيها زي أي بنت وقعت على بوزها وحبت، بتحط أي حاجة بعد الحب ده، وبتلاقي نفسها بتسيب اللي وراها واللي قدامها عشان تلحق حبيبها اللي كان بيسافر كتير، وزي أي بنت بسيطة جدا، بتفكر في الجواز من بعد ارتباطها بأسبوع، وبتلقائية شديدة بتطلب ده من المقامر اللي هي حبته، واللي عشان كان واقع على بوزه هو كمان، بيقرر إنه يتجوزها.
ننط حبة كمان ونشوفها زوجة وأم، وحاسة إن إنجازها كزوجة أكتر بكتير من إنجازها كنجمة مسرح، وجوزها المقامر لسه بيسافر وبيقامر وبيرجعلها كل فترة بلكشة فلوس محترمة.
الحياة ولا أروع، جيس وات؟ لسة اللي جاي أحلى، بتولد بنت جميلة بتحل عقدتها مع الجمال، وبترجع للأضواء تاني وبيلمع نجمها أكتر م الأول، والحياة بتزداد حلاوة وجمال لحد ما المقامر الشاطر بيفقد حظه وبيبدأ يخسر.
زي أي واحدة بتشوف في الأول إنها مفروض توفرله حب كتير وتسيبه يتعامل في مشاكله الخاصة بطريقته الخاصة، وزي أي واحدة برضو مبتعرفش تعمل ده كتير فبتحاول تتدخل وتساعده ماديا، وزي أي راجل بيرفض المساعدة دي،وبيبدأ منحنى السعادة ينزل ومنحنى الدراما يعلى والراجل بيتحبس سنتين، وبيطلب منها تفكر في الطلاق على ما يخرج لأنه مش عارف يجاري نجاحها، وكرامته كراجل ناقحة عليه ومش مخلياه عارف يعيش في دور ممثل تاني في مسرحية بطلتها المدام.
وفي النهاية بينفصلوا وبترجع للمسرح وتتفرغله تماما كسيرة الفؤاد مهيضة الجناح وأي حاجة على زون فعيلة الفعال.
في القصة دي، كل بنت هتتفرج عالفيلم هتشوف لمحة من نفسها، اللي أهلها كانوا دايما بيحسسوها إنها أقل من أحلامها، واللي عارفة إنها مش جميلة بس بتعافر عشان موهبتها تعالج الأزمة دي، واللي بتحب فتقع على بوزها وتسيب الدنيا عشان اللي بتحبه، واللي مع كل نجاحها في شغلها بتحلم تبقى زوجة وأم، واللي وقفت مع راجلها لما وقع لينتهي بها الحال بتاخد على قفاها وتتساب لأنها ناجحة.
2- باربرا سترايسند Vs فاني برايس
نفس عميق .. شهيق
هووووووف
زفير
طيب، باربرا من النجمات اللي بيمثلولي أيقونات جمالية خالدة، ومن الناس اللي بقعد أدور على صورهم وأجمعها على بينترست وكدهون، وباربرا لما عملت فاني، وكونها قدرت تطلع في دور واحدة مش جميلة ومتصالحة مع ده وتسف على مناخيرها ورجليها الرفيعة، وتواجه الموضوع كله بالكثير جدا من السف، والغنا والرقص.. الموضوع يفوق احتمال أي حد.. تو ماتش حلاوة يعني.. إيه يا شيخة؟ إيه يا شيخة بأه يا شيخة؟
ملامح وشها الوديعة جدا، وأداءها اللي تحس إنها مبتبذلش أدنى مجهود في الوصول ليه، الشخصية لابساها تماما.. تحس إنها لما الكاميرا تطفي واللوكيشن يفضى وتروح بيتها بتتعامل كده مع الناس فعلا.. وإن فاني برايس هي الوش الحقيقي لباربرا سترايسند.
حركة جسمها وملامحها، تون الصوت اللي بتغني بيه أغاني الفيلم بحسب حالة كل أغنية، واللي بتقول بيه جملها في الحوار.. مذهلة.
3- عمر الشريف
في وسط كل الطاقة اللي طالعة من باربرا في الفيلم، صعب إنك تلاحظ عمر الشريف أصلا، أداؤه خافت جدا قدامها.. الست كانت حاطة عليه حاطة وحشة يعني، اللهم إلا المشهد اللي كان بيغنيلها فيها you are a woman I'm a man، واللي كان في رأيي ألطف ظهور لعمر في الفيلم كله.
4- الأغاني.
من أول أغنية في الفيلم، الروح الخفيفة اللي بتغني بيه أغنية البداية، واللي بتزداد خفة في الاستعراضات، وأداءها المتميز جدا لأطرف معالجة شفتها لباليه بحيرة البجع، واللي بتجمع فيه فاني/باربرا بين رقص الباليه والغنا والساركازم في عرض واحد حتى لتكاد الشاشة تنفجر من فرط الحلاوة.
أغنية don't rain on my parade أو ما يوازي "خليكو في حال أهاليكو بأه"
واللي كانت بتغنيها لما حاولوا يمنعوها من إنها تسيب العرض وتسافر لعمر الشريف أو "نيك آرنستين" كلمات الأغنية اللي بتعكس الإدراك اللي كنا بنقول عليه في شخصية فاني، أنا عارفة إن الدنيا ممكن تطربق على دماغي بس محدش ليه فيه، أنا مدركة إن ممكن النهايات تبقى مأسوية بس اللي بيشيل قربة مخرومة مبتخرش غير على قفاه.. الطاقة اللي بتغني بيها، الثقة والبهجة والتحدي والقوة اللي في صوتها والشقاوة اللي ف ملامح وشها، ذاتس وات آي كول بيرفكشن ليديز آند جنتلمن.
أغنية Sadie Sadie married lady،
البنوتة الشقية اللي عمالة تتنطط من أول الفيلم زي الكورة الشراب، بتستسلم لحلم الجواز والبيت والخاتم والنونو، ,وإن كانت محتفظة بعقدتها إن العريس كان أحلى من العروسة، بس كله بيدوب في حالة البهجة العظيمة اللي هي فيها.
وطبعا، وأكيد وحتما أغنية الفينال ..
عبقرية باربرا كممثلة ومطربة وأي حاجة تانية في الدنيا بتطلع كاملة غير منقوصة في الأغنية دي، كانت لسة متفقة عالطلاق مع عمر الشريف قبل ما تطلع المسرح بخمس دقايق، التوهة اللي في نظراتها وهي بتغني لأول وهلة، نفس التوهة في نظرات واحدة لسة مكتشفة حالا إنها ودعت حب حياتها وحاسة رجليها في الهوا، الدموع، الصوت الواطي اللي بيعلا بالتدريج.. إحساسها بالكلام، إحساسها بالكلام، إحساسها بالكلام ياخوانا ياخوانا ياخوانا.
5- الألوان والأزياء
ديكور الفيلم مبهج، معظم الأحداث بتدور بين المسارح وكواليس المسارح وبيت/قصر عمر وباربرا، جو عام من الفخامة مسيطر عالصورة، مريحة بصريا ومذهلة في نفس الوقت، ألوان مبهجة وناعمة، لو فقت من نشوة تمثيل باربرا وصوتها ممكن تتفرج عالفيلم تاني عشان تستمتع بالألوان مش أكتر.
6- ماستر سينز وفيفورت كوتس وأشياء من هذا القبيل:
1- لما بتطلع ترد عالصحفيين وهي بلبس الاستعراض في دور طفلة، وبترد على كل سؤال من أسئلتهم اللزجة بنكتة أو إفيه بسرعة بديهة مش منطقية، وعلى وشها ابتسامة عريضة جدا، وبتيجي عند اللي سألها "آنسة برايس، لسه بتحبيه؟" فبتكشمله فشخ وتقوله " إسمي مدام آرنستين"، ومبتردش عالسؤال وبتجري وتسيبهم.
2- لما بتقابل عمر الشريف عالمحطة بعد انقطاع سنة تقريبا، وبيطلب منها معاد، وبيقولها هستناكي، فبتقوله "مفيش قانون يمنع ده، الناس بتستنى طول الوقت"
3- في أول الفيلم خالص لما بتدخل المسرح وتقف قدام المراية، وتقول لنفسها " hey gorgeous"
وبعدها بكام ثانية لما بتقف عالمسرح الفاضي وتقتل الجمهور الوهمي ببندقية وهمية، في إشارة لإن ملعون أبو النجاح اللي خد مني حب حياتي.
4- وهي بتودع عمر الشريف وهو رايح السجن في المحكمة، وفي آخر المشهد الجد جدا، بتنط نطتها الاستعراضية المميزة عشان تكسر حدة المشهد النكد.
5- أمها لما كانت عارفة إنه بيغرق في الديون وقالتلها "حبيه أقل وساعديه أكتر"
الفيلم حلو، شوفوه، وشوفوه تاني، واحتفطو بيه في قائمة أفلامكو المفضلة.
ليست هناك تعليقات:
إرسال تعليق
قول ما بدالك