بحب مارلين مونرو لأسباب كتيرة مش من ضمنها موهبتها المثيرة للجدل، البعض بيقول إن مارلين عروسة بلاستيك عملوها الأمريكان لأسباب مهتميتش أعرفها، والبعض بيتغنى بموهبتها المتميزة كمغنية وممثلة. بالنسبالي مارلين أيقونة إغراء وست ذكية، عرفت تستغل إمكانياتها كأنثى وموهبتها اللي ممكن نختلف عليها عشان تعمل حاجات كتير جدا، عاشت 36 سنة بس، وسابت إسم هيعيش قرون.
يمكن تاني سبب لحبي لمارلين بداياتها، الطفولة التعيسة، جدا، جدا بأه، اليتم والتنطيط بين الملاجىء والاغتصاب والجواز وهي بنت 16 سنة، حتى لو كان بمزاجها، بس فكرة إنها تتجوز وهي بنت 16 سنة مؤسفة بالنسبالي في حد ذاتها.
فيلم Some like it hot واحد من الأفلام اللي المفترض إنها سابت علامة في تاريخ مارلين في السينما، وخدت عنه جولدن جلوب أحسن ممثلة، بس الفيلم في رأيي أوفر ريتد.
الفيلم خفيف، كوميدي، والأغنيتين اللي غنتهم مارلين في الفيلم I wanna be loved by you و I'm through with love حلوين جدا، ومن أقرب أغانيها لقلبي، سواء الدلع والشقاوة اللي في الأولى أو كسرة النفس والغلب اللي في التانية، بس أداء مارلين مكانش واو يعني، مأبهرتنيش ومضايقتنيش في نفس الوقت، اللي بسطني فعلا بخفة دمه وأداؤه كان جاك ليمون.
جاك بيعمل دور عازف باص بيضطر يتنكر في دور واحدة ست هربا من المافيا، بعد ما كان شاهد بالصدفة على جريمة قتل من تدبير إحدى عصاباتها، والحلاوة الحقيقية كانت في تمثيله وهو ست، اللي ممكن جدا يفكرك زي ما حصل معايا بأداء عبد المنعم ابراهيم في "سكر هانم" لما كان عامل ست برضو، نفس التلقائية والخفة والإتقان لو جاز التعبير، أقصد اتقان تمثيل دور راجل بيمثل إنه واحدة ست، وإتقان تمثيل الست نفسها.
يمكن أكتر حاجة ضحكتني في الفيلم هي قفلته المتكروتة جدا إن جاز التعبير، جملة النهاية لما الراجل اللي كان معجب بـ "دافني" أو الست اللي كان بيمثلها جاك ليمون، كان مصر يتجوزها برغم إن جاك كان بيحاول ينهيه عن ده من غير ما يقوله حقيقة إنه راجل بكل الطرق الممكنة، وآخر ما زهق شال الباروكة وقاله "I'm a man " فرد عليه العريس "No body's perfect".
الفيلم لطيف بس ميتشافش مرتين، ومفتكرش هيسيب علامة في دماغ اللي هيشوفه، وبرضك مارلين في القلب.
ليست هناك تعليقات:
إرسال تعليق
قول ما بدالك